مساء الخيرات :)

أخر بوست نزلته كنت توني متخرجة

و اليوم أنا مدرسة بأحد مدارس المتوسطة على قولة أخوي صرتي أبلة صجية الحين

:p

قبل لا نبلش دوام بالمدراس كان عندي دورة لمدة اسبوعين للمعلمين الجدد

بعدها رحت مدرستي

عندنا نظام البصمة

مكتبي

أول يوم دخلت على الوكيلة سلمتها أوراقي قتلها تعيين يديد طالعتني من فوق لي تحت

لووول وقالتلي عبالي طالبة

مسؤولية الحين أكبر وايد من الميداني 

وعندي اشراف 3 صفوف تحت وانا مكتبي فوق 

بس قلت احسن عشان احرق 

الاكل بالدوام خراااااااااب 

بس لازلت مسيطرة عالوضع 

:)

اشوفكم على خير  

تخرجت !!!

اي اي اي و الله و تخرجنا

انا لما الحين مو مستوعبة ترا و احس اني ناسية آخذ مادة أو شي

وايد أحداث مريت فيها هالكورس منها الزين و منها الشين

خلصت من الميداني و كان حده متعب و حلو بنفس الوقت

بنات سادس سوو فلم هندي اخر يوم

فاقدتكم حبايبي

لووول خطي يضحك صح؟

____________________________ 

اجتماعاتنا الاسبوعية أنا وقروبي عشان مشاريعنا



اليوم كانت مناقشتنا و و خلصنا على خير الحمدلله

_____________________________________

حاشني التهاب بالوتر الظاهر من كثرة التصليح وقعدة الكمبيوتر على كلام الدكتور

_____________________

وخلصنااااااااااااااااااااا

كان في مشروع حفلة نسويها بصالة بس للاسف البنات ما اتفقو

طلعنا اليوم انا مع 3 من اعز رفيجاتي واحتفلنا بتخرجنا بروحنا

ورحنا الأبراج

تغديناا مع بعض

وكانت القعدة وايد حلوة و هدوء ما كان في ناس وايد

انشالله تتكرر و نظل نشوف بعض على طول يا احلى رفيجات

_________________________

اخر شي بقوله اني صرت خالة للمرة الثانية

و هالمرة بنوته و سموها على اسمي

احس أن وايد اشياء بتتغير واني داشة على حياة يديدة

:)

الله يوفقكم كلكم واللي ماتخرج يتخرج

هذا باختصار عن اللي عشته بهالكورس

وانشالله بفصل بالحجي بالبوستات الياية

أشوفكم على خير :)



يوم طويل

مساء الحب

اليوم كان طويل بالمدرسة

وشغل وايد باجر حفلة المتفوقات

البرزنتيشن عطوني اياه السلايد شو و البوربوينت وبرنامج الحفل

وخلصته بالوقت الحمدلله و عجبهم

الصراحة وايد قاعده افكر بعد الميداني راح اكمل بالتربية أو لا

فيها متعة وبنفس الوقت تعب

ويعتمد أكثر شي على الراحة بالمدرسة و القسم و الادارة

واختم فضفضتي اليوم بولد اختي

لما ارد من الدوام و اكون تعبانة بس شوفته ترد روحي

وترجعلي طاقتي مرة ثانية

انا بغيته مبجر عشان ابلش مو قبلها بيوم بس هذا للي صار

وغير هذا في حصتين لازم احضر مشاهدة 

و معطيني امسك احتياط 

و يبوني اخذ صفوفي حصص اضافيه

 :S

كل هذا وانا دوامي لما 12:30

المهم كننت شغاله على البوربوينت من الصبح و خذيته معاي الاحتياط



تصبحون على اخر يوم بالاسبوع

و happy weekend

اشوفكم على خير :)

مساء الورد

هالكورس عندي تدريب ميداني باحد مدارس المتوسط

عشان تعرفون ليش لاهية عنكم

 :p

عندي مرحلتين سادس وثامن

أول يوم طبعا كان الرعب كله

طبعا تحضير وطابور ومناوبات وتصليح

يعني ماعندي وقت و غير هذا بس اخلص

بعض الأيام فيها محاضرات لما 4 العصر

و عندي يوم اقعد مع المهندس عشان مشروع التخرج

 التعامل مع البنات: وايد احتار بعمرهم لاهم صغار ولا كبار فترة انتقالية احسها صعبة.

التحضير:نوعا ما ماشي الحال وقاعدة أسوي كل شي بوقته ولو ان ضغط.

يوم الكارثة:اللي كان أمس كان المختبر فيه صف

 فاضطريت اخذ غرفة العروض وشلت اغراضي

و رحت الداتا شو موصل على جهاز فدخلت الفلاش

بس حسيته وايد بطيء واشيله واحطه بلابي

 واكتشف ان حايشه 2 فايروس و مايشتغل شي

و البوربوينت و الفلاش كلللللللللل شي بحححح

المشكلة :

1. الدرس حدددده طويل .

2. الصف وايد شياطين و يضيعون وقت الحصة.

بس شرحت الموضوع حق المشرفة و المدرسة الأولى لانهم كانو حاضرين عندي

بس الحمدلله رقعت السالفة و عدت على خير

ويقولون مابين علي اني مرتبكة

:)



واختم بوستي بصورة الحلوين

هذيل بنات ابلات ايون من الروضه عند امهاتهم نهاية الدوام

حيااااااتي حيل حبيتهم

ونشوفكم على خير :)

العاصفة الترابية عندنا

  الحمدلله على كل حال و الأمور عدت على خير بعد يوم عصيييب 

التلفون ما طاح من ايدي و ولد اختي مسكين عندنا توه شهرين و مختنق

وبنت عمي اخوها مسوي عملية و نايمه عندي و خايفة يصير فينا شي وتقول

ملاك سامحيني وانا @@ على شنو يما شفييج تقولي اخاف اموت و انا زعلتج بشي

حياتي وانا عبالي تتغشمر واطفرها اقولها ماسامحج جان تبجي جان ألمها

 والمصيبة الكبيرة اني قايلة حق الخدم دخلو قفص الطيور ( زوبا و زوما و أخوانهم ) المهم 

على ما استقرت الاوضاع شوي رحت اتجول بالبيت اجيك و والا ادورهم ماكو 

@@@@@@@@@@@@

والا حضرتهم ناسين يدخلونهم زين لحقت عليهم 

---------------:::::::::::::::::::-------------------

والسالفة الثانية الحين 

اختي وريلها كانو بدبي و بردتهم انعفس الجو 

وقالو راح ينزلون بالدمام 

هالحجي من 7 المغرب 

دقو 10 الصبح معصبين 

السعودية مارضت ينزلون و طول هالوقت طايرين بالجو 

ناطرين اذن عشان ينزلون :@

والحين يبون يردون ومحد معطيهم ويه 

الله يردهم بالسلامة مسكينة تحاتي ولدها وريلها عنده دوام 

_______________

طبعا سوري عالقطيعة الطويلة  و انشالله البوستات الياية تعرفون شلي شاغلني 

أشوفكم على خير   

صباح الخير

كالعادة سهرانه عشان البيبي

بس اليوم جد قاعدة احس بارهاق

يعني من انزل الصاله ملاك سوي جذي ملاك حطي جذي

فلانه بتيي و ريل اختي هني

................

المهم هالايام صرت اتابع التلفزيون وايد

وايد برامج و اشياءات اول مره اشوفها

بالجو العائلي وايد وناسه

قبل جم يوم قاعده افرفر بالقنوات و طحت على شي

 loool

شوفو ماسك ميكي ماوس مادري شكو

و كان يتحجى عن الاوضاع بمصر

......................

على طاري الاوضاع

ترى صاير بالبيت ماكو غيري تخيلو غدا وعشا علي انا

واذا نقص شي حق الطبخ انا اللي اروح اييبه

صج تعب بس احس قمت اعرف اسوي اشياء مع بعض

لا وسويتلهم ورق عنب كلهم استانسو عليه و كنت بصوره

بس رحت ورديت ماكلين نصه لووول

وهاذي سلطه جرجير و جبن وايد يحبونها بعد

:)

وتصبحون على خير

اتمنالكم يوم حلو 

صباح الشوق

قعدت من النوم سبحنا ولد اختي و بعدين تغديت

لووول غدانا اليوم كل شي مرق باميا  وعيش دياي و مووش

مع هذا ماكنت مشتهيه اكل

خلصت الغدا  و شربت جاي لين قلت بس و جابلت ولد اختي اللي صاير وايد يحن 

خلصت شغل المطبخ 

و كان فينننننني سوق 

رحت بس لما رديت و على اللي شريته فيني سوق اكثر 

عندي سؤال محيرني ؟؟؟؟؟؟؟؟؟؟؟

ليش الرياييل يتضايقون لما يروحون السوق معانا ؟؟؟؟؟؟

اخوي اليوم كللش ماله خلق وكل ما دشينا محل يلا و يلا 

وللعلم هاذي ثاني طلعه لي بالعطلة 

والله ماكو وقت كل شوي يايين ناس حق اختي يتحمدون لها السلامة

و الياهل الله يحفظه كل شوي مستمرض و الا يحن 

وانا اجابله فترة الليل لما الحين 5 الفير

وبعدها اخيييييييرا اتوجه حق غرفتي اللي صايره ماقعد فيها كلش 

فيني النوم من امس مو نايمه شي 

بس قلت ارتب غرفتي شوي على ما يأذن 

......................

لما ماتبي تفكر بشي معين تشغل روحك انك تسوي اشياء 

بس انا وايد وايد افكر حتى وانا نايمه :(

بس تصدقون هالفتره صج عرفت شنو يعني تلفزيون

قعدتي بغرفتي على طول التلفزيون شغال و ما اركز شنو اكو ماكو

بس الحين القعده بالصاله وايد اونس و اتابع وايد 

..................

والحين استودعكم الله 

اتجهز حق الصلاة و بعدها اغووووص بفراشي الدافي 

اشوفكم على خير :)

 

صباح الخير

 :)

يوم طويل اخيرا مشى

ولد اختي اليوم كان تعبان ووديناه المستشفى 

مسكين صاير خامل و كل ما يشرب حليب يرجع 

............................

احس باشياء متضاربة

وقتي مليان و بنفس الوقت في فراغ كبير داخلي 

مجابلة البيبي طول اليوم و البيت و اخواني 

وقت اللي اقعد فيه شوي بروحي احس بفراغ 

ابي اسوي شي يلهيني 

..........................

طالعت افلام وايد اليوم و جابلت التلفزيون 

ودي انام واااايد 

:)

اسفه عالقرقه بس حسيت ابي اتكلم و ادري هني احسن مكان يحضن احاسيسي

تصبحون على خير 



بابا جابر

لوّ النسيان .. هذي عادة الانسان هذي خامس سنة .. بفراقه نكابرولوّ الايام مرّت .. يا

قصر دسمان ترانا .. مانسينا .. شيخنا جابر

يـٍَٱ 'طّـٍَيرٌ ' لـّۆٌٍـَۆٌٍ دّرْبـٍَﮛ عَلْـےّ قٻٍرَ " چٱٻر " قـَّلہٌ تـَرٍٱ شْـَشْـّعٌـَبـٍْﮛ "يـبـيـك

اشوفكم على خير :)

صباح الحب كلكم

انشالله اليوم يكون حلو

من جم يوم انا صرت خالة أخيرا و للمرة الأولى 

 D:

فرد يديد بالعايلة 

صج اختي تعبت و كان راح يروح بس الحمدلله على كل حال

طبعا انا خالة شريرة 

ريل اختي يقول خلاص تعود على الشيل منج 

حيااااتي نتفة كل شوي شايلته اتمشى فيه 

كتكووووت حياتي كل شي فيه صغير

بس توقيييته حده مو شي 

فاينل و حالة 

هالولد عنيد وراسه يااابس 

وايد يحن 

لا و يبوني اتزوج واييب بنوته حقه بعد 

:)

موفقين بالامتحانات كلكم 

شدو حيلكم 

اشوفكم على خير