السبت، 27 سبتمبر، 2008

عيد سعيد





يقولون عيد سعيد :)



بس انا وحيده يوم العيد



و المفروض بصباح العيد اروح مقبرة احلامي



و ابجي و الناس تعزيني



العيد بعد يومين ...


العبرة تخنقني وايد و تخليني اتمنى لو ماكنت موجوده



مو قادره اجامل بابتسامه وراها جرح كبير



مجروحه




باختصار هاذي الكلمه اللي اقدر اوصلكم فيها حالتي



و بهاللحظه بالذات اتألم من جروحي



انا وحده ماقدر انسى قلبي دفتر ذكريات



شلون بنسى جروح اكبر من احتمالي



حتى ان الناس تنسى الموقف و مرت عليه سنين



بس محفور بقلبي و لما ايي نفس الشخص يجرحني مره ثانيه يرجع شريط الألم كامل و جنه موقف يديد جدام عيني



يمكن تقولون حساسه زياده بس والله ما ابالغ هاذا الواقع اللي اعانيه



و السنه هاذي اكثر سنه مرت علي متعبه





بس ان شاء الله من هالعيد بحاول ابدي حياتي من يديد





لاني الفترة اللي فاتت كنت مثل الميته مافيني حياة على قولتهم :)





ادري تشوفوني يائسه و متشائمه بس ما عليه اللي مريت فيه كان فوق احتمالي




بس انا للحين اؤمن في جمله دايما يقولها عمي : و من يتأهب صعود الجبال يعش ابد الدهر بين الحفر



و بوجودكم اخواني و خواتي اللي تشاركوني لحظاتي الحلوة و المؤلمه تسهلون علي كل صعوبه :)



و من غلاتكم انا ماقدرت اقطعكم مده طويله من غير لا ادش بلوقي اللي دايما تواجدكم يريحني فيه



:)


و كل عام و انتو بألف خير





السبت، 20 سبتمبر، 2008

بتشتاقون لي ؟

مساء الخير






يقولون الوقت الحلو يمشي بسرعه




و فعلا شهر رمضان قرب يخلص




والعشر الاواخر من أهم ايام هالشهر الفضيل



عشان جذي اخواني و خواتي انا راح اغيب عنكم هالفتره لي العيد ان شاء الله



و اشوفكم على خير و سامحوني على القصور




و اي شخص ضايقته بكلمه او اي شي ياريت ان يسامحني :)




و هالله هالله بالاعمال الزينه و القرآن و صلاة الليل




و الله يوفقناكلنا على فعل الخير




اشوفكم بالعيد ^_^





أختكم اللي بتشتاق لكم : ملوكه

الثلاثاء، 16 سبتمبر، 2008

حدث تاريخي .....

مساء الخير كلكم
اول امس صار شي غريب و اول مره يصير ابيتنا شي جذي
انحاشو خداماتنا الثنتين :s
عاد من جم يوم امي لما تناديهم يتأخرون على ما ايون
و في تصرفات غريبه قامو يسوونها بالفتره الاخيره يكشخون و مالهم خلق يشتغلون
اول امس نفذو الخطه لما امي كانت تطق الجرس علشان ايون و طولو واااايد جان تنزل بسرعه و دشت المطبخ و الا الغاز مبطل
سكرته بسرعه و راحت غرفتهم وشافت ماكو احد عاد قامت تشوف بغرفه الغسيل و هم ماكو احد و بعدين بالحوش شافت سلم جان تنادي ابوي و ابوي طلع بسرعه يدورهم بس للاسف ماقدر يحصلهم وراح المخفر بس قالوله لازم تمر 24 ساعه بعد هذيل خدم ليش ينطرون عليهم و بعدين قعدت انا و حللت الموضوع كله و فهمته
الخدامه القديمه كانت تبي تسافر و لما ابوي حجزلها قالتله: خلاص ودني بيت ثاني و ابوي قالها مو بكيفج الحين حجزت و خلصت
و اهي قصت عاليديده و خذتها معاها عشان لا تفتن عليها
بس شلون خذت كل اغراضها ماني عارفه
مع ان عمرنا ما زفيناهم و لا اذيناهم بالعكس و الله
بس حسبي الله و نعم الوكيل
صح كلام يدتي كلا تقول الخدم شياطين لا يكسرون خاطركم
الحين مشاكل الخدم صارت اكثر من مشاكلنا
اللي تنحاش و اللي تسوي سحر واللي تعذب اليهال
الواحد مو قادر ياخذ راحته حتى ابيته
عاد عقب هالسالفه ملوكه الحلوة صارت اهي ماما و اهي بابا و اهي ميري
دشيت المطبخ امس لان امي تعبانه ماتقدر و سويت سلطه و عصير >> وايد علي
و اليوم مادري شراح اسوي غدا شفتو نهايتي من كان يصدق ااانا ملوووكه ادش المطبخ :P
على فكره على ان ابوي معصب من اللي صار استانس لما شافني بالمطبخ
و بانتظار الخدامه اليديده ان شاء الله تيي بسرعه :(

الأحد، 14 سبتمبر، 2008

اشتقت لهم

مساء الخير









اليوم وحده من اعز رفيجاتي اللي كانو معاي بالثنوي دزتلي مسج من الصبح و بجتني :(




لان علاقتنا صايره مو حيل مع بعض عقب ماكنا يوميا نشوف و نكلم بعض




بخليكم تقرون المسج عشان تحسون فيني :




عزاه يا صباح الدراسه مع الطابور و عزاه ياصفن جمعنا سويه و الحين كل ما لفا منه قصور عقب المشاهدالصوت سمعه شويه من بعد ماكنا نتقابل بالطابور شهور الحين نبطي عن بعضنا بمكالمه هاتفيه







يحز بالخاطر فراقنا عقب الوقت الطويل اللي كنا فيه مع بعض


ليت الايام ترجع :)







و ان شاء الله براضيها و نرجع مثل قبل بس و الله عقب التخرج كل وحده راحت مكان و لهينا شوي







اي في بعد شي حبيت اقولكم عنه






امس و انا احوس بالشبكه العنكبوتيه لقيت طريقه عمل ستاند حق الطيور





عاد انا ماحبيت اطوف هالفرصه اللي يمكن تقربني من زوبا





و يبت الاغراض اللي احتاجها و بديت بس و انا اشتغل تعور صبعي الصغير احترق شوي من الصمغ و الحين منتفخ






لا و عقب هالتعب مو راضي يقرب منه الاستاذ زوبا >> ولدي عاق





بس بحاول اقص جناحه عشان اقعده غصبن عليه :D >> الام الشريره لووول






لاتلوموني اليوم عطشانه وايد حتى مو قادره انام كل ما احاول اتخيل بطل ماي






قلت حق امي اليوم بتفطر ماي لوووول







و سلامتكم


اشوفكم على خير :)

الجمعة، 12 سبتمبر، 2008

للصبر آخر :(

اليوم مزاجي حده مو شي
>> الظاهر من زمان ما بجيت
اعصابي حدها تعبانه :(
متضايقه و حبيت افضفض لكم
مادري يمكن ليش اني نمت مبجر امس صارتلي حالة كآبه
قاعده بروحي بغرفتي مع زوبا و اهو مسكين صارله جم يوم ماطلعته من القفص معاقبته
لا فوق كل هاذا يبت مصلح عشان اختفت عندي قناة الوطن و حضرته مسح نص القنوات
:(
الله كريم الله كريم يهون الجرح الاليم
للصبر آخر
ملاك الحزينه

الثلاثاء، 9 سبتمبر، 2008

اخوي اللي موطالع علي :p

((اَللّهُمَّ اِجْعَلْ لي فيهِ نَصيباً مِنْ رَحْمَتِكَ الواسِعَةِ، واهْدِني فيهِ لِبَراهينِكَ السّاطِعَةِ، وَخُذْ بِناصِيَتي إلى مَرْضاتِكَ الْجامِعَةِ، بِمَحبتِكَ يا أمَلَ الْمُشْتاقينَ.))
امس داومو الابتدائي و اخوي مسكين من هالضحايا
مسكين عاد صج ماله خلق قعدته الصبح غصب رضى يقوم و ماقدر يصوم لا و اللي قاهرني ان ما اكل شي
طول فتره الدوام
دلعته قبل لا يروح :p
وطبعا انا ماكنت قاعده الصبح بس واصلت عشان اشوفه قبل لا يروح
الجو وايد حار و اهو من النوع اللي ما يعرف يقعد ووايد شيطان
و خشمه بسرعه ينزل دم :(
المفروض ما يتعبون اليهال بهالحر الجو كلش ما يساعد
و اخوي الله يهداه بعد عليه سوالف
على بالي وحده ماقدر انساها
الناظره دقت على ابوي و لما راح لها قالتله شوف قلم ولدك وابوي عباله اكو شي يوم شافه مات ضحك
صغير بشكل مو طبيعي و كل يوم امي تحط له قلم يديد و يبريه لين يصير عنونو
و غير سوالف النحشه من الصف و ناط بره المدرسه جم مره
و يسوي روحه بريء :D
احس اني تكلمت وايد و دخت امبي ترى للحين مواصله
تصبحون على خير

الأحد، 7 سبتمبر، 2008

ملاك مريضه :(

مساء الخير و الصحه و الابتسامه
>> مريضه ييبولي ورد
امس تسحرت من برجر كنج و مستانسه يحليلي مافيني شي
و ما ياني نوم قعدت اسولف مع رفيجاتي بالمسنجر و اطالع اعاده المسلسلات اللي طافوني العصر و انا نايمه
عاد على هالحاله لي الساعه 12 الظهر بعدين حسيت اني تعبانه
شوي و شوي شوي قمت ابجي مثل اليهال خو انا دموعي بسرعه تنزل
و اختي مسكينه كل يوم تسهر معاي و تنام بغرفتي عورت قلبي ازعجتها واعليا
بس بعدين نمت من التعب و ماقعدت الا الساعه ثمان و نص
و البيت هدوء ماكو االا انا و اختي و اخوي طبعا قاعدين بغرفتي
و مايعرفون يقعدون ساكتين كلا هواش عاد قعدت دقيت على امي
>> هذا وقت الدلع يا ملوكه :D
عاد قتلها ابي عصير عوار قلب و يحليلها بسرعه يت و يابتلي بعد عمري امي
شربته و صحصحت طبعا هاذا الشي الوحيد اللي شربته اليوم و المسكنات اللي خذيتها بس
بس الحمدلله الحين وايد احسن بس ودي يدلعوني اكثر احم احم
و الله الصحه اكبر نعمه بس مانحس فيها الا لما نمرض
و يكون احسن وقت حق الدلع بعد :p
الله يبعد عنكم كل شر

الخميس، 4 سبتمبر، 2008

كنت يوعانه

السلام عليكم







امس عقب الفطور >> طبعا ماكليت شي ترى بس تمره و شويه بطاط




رحت بيت يدي و ردينا البيت عالساعه 12 و ثلث عاد قلت حق امي ابي وجبه عاد خواتي ساعدوني بالحنه :d



و بعد محاضرة عريضه عن الاكل ودتنا


طبعا برجر كنج اكثر مطعم اطلب منه






طبعا امي مسكينه كانت مسويه لزانيا بس تسحرو فيها ابوي و اخواني انا كان عذري ان فيها لحم :p

و هاذا البطاط غرامي احلى شي






وهاذي صمونتي



و هني اخوي الصغير كان ياي يبي مني شريط بس شاف البطاط ماقدر يقاوم اهو اكل بعدين قالي ملوكه ميخالف اكل
عاد هاذا حبيبي ماقدر ازعله جان اعطيه واحد

و آخر شي ما كملت صمونتي احم احم و اليوم حديييييييييي عطشانه و تعبانه يمكن لاني مانمت ممممم

و سلامتكم

الثلاثاء، 2 سبتمبر، 2008

بعد الفطور ...




صباح الخير ...


في البدايه تذكرت عندي صوره صورتها بتركيا من سنتين دام اني مواصله لي الصبح
هناك كنت دايما اقوم مبجر لان جوهم حلو و لازم اقوم عشان لا تفوتني الرحلات :p




عاد هالمنظر كان يم بحيره بمنطقه عالجبل اسمها ابانت صراحه طبيعه عجيبه عندهم

مممم

امس قعدت متأخر عالساعه خمس المغرب :$ طبعا محد عاجبه نظام نومي و قعدتي
المهم ماكان في شي بالتلفزيون قعدت اسولف مع خواتي و دشيت المسنجر
كلمت رفيجتي شوي و بعدين زفيت اخوي لان ينني

و تفطرت اليوم كان الفطور حلو ممم في ورق عنب و بطاط >> اكلتي المفضله
و سمبوسه و بيتزا و ربيان >>( انحشت منه طبعا قعدت بآخر السفرة )
بعدها امي قالت بتروح السوق تشتري هدايا حق مرت خالي اللي توها والده
طبعا انا اموت باليهال عاد نطرتها تأخرت لي الساعه 11 عاد انا كنت حدي متنرفزة لاني اول وحده بدلت و كشخت و ناطرتهم من الساعه 8
عاد بدون حجي انا ركبت السياره و سقت محد علق طبعا لان يدرون اني حدي معصبه






و رحنا بيت خالي و اول مادشينا و البيبي بعد عمري يبجي












عاد اهو كان يبجي بيد امي خذيته عندي شوي













حس بالامان :D









هني عاد فتح عينه و تأقلم عالوضع




بس مسكين تدرون ليش ؟؟؟


لان اهو الثالث بين اخوانه اكيد راح يهملونه مثلي لوووول