السبت، 27 ديسمبر 2008

احلى شي ...



صباح الخير






تدرون شنو احلى شي وقت المرض ان نحس شكثر اشياء نقدر نسويها لما نكون بصحتنا




و انا تعبانه بفراشي فكرت وايد حسيت ان مابي اكون بروحي و خليت امي تنام عندي جني ياهله لووول



اخوي اللي كل مره ازفه على اقل شي صرت ادلعه



اشتقت حق كل رفيجاتي اللي من زمان ما كلمتهم




بجيت :( اي و الله بجيت من صجي مو دلع لان بهالوقت تمنيت الناس اللي صج احتاجهم يكونون يمي



.................



اليوم صرت احسن و رحت عند الغاليه يدتي


و ان شاء الله باجر براجع و ان شاء الله خير



......................






زوبا و زوما






مساكين تقريبا مر اسبوع ما دشو غرفتي اللي اهي بيتهم و موطنهم


يبتهم اليوم وكلتهم و جابلتهم و نظفت بيتهم و ألعابهم


سبحان الله هالاثنين فيهم تناقض عجيب تشوفونهم بقمه الرومانسيه


زوما تلعب بقذله زوبا و مره وحده يقعدون يتهاوشون و يعضون بعد


وضع غريب يا ربي مادري ليش


لووووووول


و المنظر العجيب اللي الحين جدامي زوبا نايم و مسوي روحه معصب يفتح عين و يسكر عين لانها قاعده تنظف روحها يمه تسوي ازعاج ما يقدر ينام الولد
.....................
عرس ولد خالي
والله حدي اعتفست و شريت النفنوف بسرعه على اساس العرس عقب اسبوع زين اني ماحجزت الصالون بعد
لان العرس على اخر شي تأجل لي شهر 3
صج انقهرت :( >> الله يعين لو حاجزه جان اسوت
........................
حابه اقعد بروحي اليوم طالعت فلم و جابلت كتاب(زيارات ليليه) و الحين النت
وراي قعده من الصبح بس ماودي انام الحين
شاربه كوب كوفي و دونت من وين اتيي النومه
صج اذا حبيتو تشربون قهوه لازم قبله تشربون قلاس ماي عشان يغلف المعده
لا تسوون مثلي تشربونها من صباح الله خير على اساس تتنشطون ترى مو زين
......................
يبطون جبدي الناس اللي ما يكلمونك او يسلمون الا عشان يبون شي
و يبطون جبدي بعد الناس اللي تتدخل بأشياء مو لها
و يبطون جبدي اللي يسون روحهم ملائكه جدامك و من وراك شياطين بيدمرونك
..................
و الحين انا استأذن و اكمل هذرتي بالبوست الياي
اشوفكم على خير

الخميس، 25 ديسمبر 2008

حرااااااام


مساء الخير







شلونكم ان شاء الله بخير




انا مو زينه :( ملاك طريحه الفراش




مع هاذا قاومت و قلت لا انا لازم اداوم يعني اول مره بتشيطربس ما مشى الحال




اختي شافتني قالتلي لاتداومين شكلج تعبانه وانا يعني مريضه ما تحجى بس اطالعها




طلعت و وصلت الكليه دقيت على امي طبعا عشان لا تحاتي لووول




و قعدت بالسياره اقرا كتاب (زيارات ليليه) لي وقت المحاضره




و بعدين نزلت و الحمدلله اليوم كان آخر محاضره حق الماده بعدين قعدت مع رفيجتي شوي على اساس عندي محاضره الساعه 12




و عقب النطره لي الظهر و انا مو قادره اقعد تعبانه و حتى دوا ماقدر اخذه لان مو ماكله شي


و بعدين صج صح عصبت لان طلع معتذر :(




يعني دكتور و الله حرام

و انا الحين اكتب البوست و انا على فراش الموت :(




رديت البيت شفت امي مسكينه اخترعت و انكسرالصحن اللي كان بيدها لوووووول


لاني يايه مبجر خرعتها




بس طلعت و خلتني مع بروحي بالبيت وحييييده سويت لي غدا عشان اقدر اخذ الدوا




و قلت لازم انزل بوست من القهر اللي فيني من الدكتور الله يسامحه





عالاقل جان قالنا قبلها :(





ادعوووووووووووووووولي :( اني اصير زينه




اشوفكم على خير

الأحد، 21 ديسمبر 2008

نومي عفس يومي...

صباح الخير
عقب الويك اند اللي مر بسرعه من غير لا نتهنى فيه ناطرتني قعدة من الصبح يعني امبي مو حرام اقوم من الصبح و بهالبرد
عشان محاضره وحده :(
ترى انا مسكينه ما مداني انام الا ثلاث ساعات لاني سهرت امس عالتلفزيون احم احم ...
لا و احلامي هالايام >> مو بس هالايام ؛ صايره رعب و اشياءات وايد لا تسألوني بشنو احلم لان ما خليت شي ماحلمت فيه
لووووووول
بس و الله يعني بالحلم احس اتعب و لما اقعد متضايقه و معصبه و لاحد يحاجيني و الا انفجر بويهه
لما اوصل الكليه مالي خلق انزل بالبرد اقعد بالسياره على ما تبدي المحاضره و انزل حده حده ...
و حايشتني كآبه من الكليه و مالي خلق ادرس او حتى اداوم
مليييييييييييييت من المدتيرمات و الهومووركات ...::(
بالنسبه حق الويك اند اهم شي سويته اني شفت بنت خالي الي توها راده من السفر
لانها تدرس بره و الحين ودها تاخذني
معاها بس اهلي ما يخلوني اسافر بروحي معاها و الوقت اللي بتروح فيه الله يهداها امتحانات و حاله
عاد من زمان ما سافرت و كان ودي اروح معاها
طلعنا اول مره انا وياها بروحنا لووووووول يدتي قامت تبجي تخاف علينا
لما اروح بروحي ما تقول شي بس ليش بنت خالي معاي مادري شفيها لووول
مع ان بنت خالي زعلت قالتلي يوم اقولها بساافر بروحي ادرس ما تأثرت و الحين على طلعه شوي و نرد تبجي :p
عاد مسكينه ساحلناها قلنالها بنييب شي من السياره و انحشنا :p
و بس :)
اشوفكم على خير ^_^

الخميس، 18 ديسمبر 2008

مساء الخير




يقولون اختلاف الرأي لا يفسد للود قضيه




بس ليش لما نختلف نفرق




ليش لما نضحي و ندير بالنا على الناس اللي نحبهم من كلمه وحده تمحي كل شي زين كان منا




و نصير شياطين بعيونهم بعد ماكانو يسمونا ملائكه




عشان مصالحهم ...مصالح ...مصالح ...




لما البنت ترفض شاب لانها ماتشوفه فارس احلامها او مو الشخص المناسب خلاص تكون ظلمته وجرحت كرامته!!






مصالح




لما نقول كلمه حق و نقول راينا بصراحه خلاص نصير ناس ما تعرف الادب






حسبي الله و نعم الوكيل




سوري عالفضفضه بس حبيت اطلع اللي بقلبي شوي




الاسبوع اللي فات قطعتكم شوي لاني انشغلت بالدراسه و الامتحانات




الجو برد وااااااااايد و احلى احساس لما اكون ميته برد و اركب السياره و حدها دافيه حتى لما اوصل البيت ماودي انزل :p






و صايره احب النوم و بليل ما اييني نوم اقعد اقرا كتب لين ادوخ ...







و صايره اكل ككاو وايد مثل ما انتو شايفين :p
منو يبي لووووول ترى كليته كله :p
و اشوفكم على خير ^_^

الأربعاء، 10 ديسمبر 2008

عيدكم مبارك

مساء الخير :)
عيدكم مبارك و كل عام و انتو بخير
شلون كان العيد معاكم ان شاء الله استانستو
سوري مافضيت انزل البوست الا اليوم
بالنسبه لي العيد كان عادي ماحسيت بوناسه مثل كل مره
كان ودي اروح الحج هالسنه بس الظروف ما اسعفتني مع ان العطله حلووة

بس ان شاء الله السنه اليايه قولو آمين :p

أول يوم كان بس زيارة الاهل و الحلو بأول يوم ان نشوف ناس ناسينهم طول السنه و لا ندري عنهم

و ثاني يوم كانت عزيمه و صج استانست لان ولد عمي اللي انا مسميته و من يوم نولد مو معبرني كلش كانت اول مره يلعب معاي و حفظ اسمي و عطيته بطوطه :D

مممم

و اليوم ابوي راح ارض المعارض عشان خط ال viva و اخيرا افتكيت من الهندي :D

صج راحه نفسيه

و خطي اليديد برونزي احسن شي حق يدتي اللي كل شوي تعصب تقول ما دري شفيه التلفون و تكون اهي غلطانه بالرقم

و سامحوني عالتقصير اللي راح و اللي ياي :p
اشوفكم على خير :)

الجمعة، 5 ديسمبر 2008

عدت على خير ...

مساء الخير




شلونكم ان شاء الله تمام


انا تعبانه شوي من الجو و لويه السوق حق العيد



الحمدلله خلصت اخيرا


بس امبي اول مانداوم عندي ثلاث مدتيرمات على طول


و انا مخي ضارب و مابي ادرس بالعيد و لا حتى الحين :(



مضيعه وقتي كلا نوم و تلفزيون





اي ذاك اليوم صار شي احم احم





بغيت ازهق روح @@:/


كنت طالعه من بيت يدتي و بفريجهم باللفه طلع بويهي بقي كبير و طقيت بريك حده حده


وقفت تنحت مخترعه و اختي تهديني تقولي خلاص ماصار شي


و انا لااااااااااااا ليش مينون بغيت اذبحه جان الحين انا صرت قاتله

بعدين استوعبت ان في شباب قاعدين و انا امبي حركت بسرعه و انا مصدومه


بعدين الحظ ما اسعفني وقام يمشي جدامي و انا حدي خايفه ابيه يروح ماكو

ادوس اروح جدامه يرد ايي جدامي لين لفيت و افتكيت الحمدلله

بس امبي حدي اخترعت

و الحمدلله عدت على خير ^_^






انزين شرايكم بالتنافس اللي صاير بين شركات الاتصال :D

انا حاجزه خط viva بس للحين ما استلمته

كل المكالمات الوارده راح تكون مجانا نفس اللي سووه زين و الوطنيه

و حتى المكالمات الدوليه
و سمعت ان اول ثلاث اشهر كل المكالمات راح تكون مجانيه
بالفتره اللي فاتت خلصت من قرايه كتاب كويتي من كوكب آخر حق خالد عادل النصر الله

و الصراحه وايد حلو و خلصته بسرعه

اسلوبه حلو و متكلم عن وايد شغلات الكتاب حلو ما يملل كلش و مرتب

عن وجهه نظر الكاتب بعده امور نعيشها اليوم و عن امور صارتلها و شلون تعامل معاها


عن وضع الشباب اليوم

عن كل شي :p


و الحين بلشت بالكتاب الثاني حقه >> التجربه الانجليزيه عندما تكون وحيدا في لندن




و لحد الحين عاجبني ...




الحين استأذن




و اشوفكم على خير :)










الاثنين، 1 ديسمبر 2008

غنو لحبيبي ...




أحم احم


اول امس كان عيد ميلادي


و حدي معلقه على اغنيه غنو لحبيبي مالت عبد المجيد عبد الله


صرت كبيره خلاص عمري صار 19
صج وايد ناس ناسيني و في متناسيني بس الله يسامحهم
اهم شي رفيجاتي و خواتي و امي و ابوي :) منو بقى :p
انا اقولكم بقى خالي اللي احبه وايد و هالسنه ناسيني
بس طلعت ظالمته مسكين لان كان مسافر عشان الحج و انا مادري لوووول
ماكان وايد وناسه و لا سويت حفله و لاشي
بس الكيك اهم شي :p
طق مطر يوم عيد ميلادي شفتو شلون انا خير :p
كل سنه بعيد ميلادي ابوي يقعد يتغشمر معاي و يتطنز علي
واهو معودنا كل ويك اند الغدا و العشا من بره عاد يوم عيدميلادي قالي انا يايب الغدا اليوم بس عشان عيدميلادج
و تحجى عني يوم كنت صغيره و شلون ييت حق هالدنيا :p
لان وقت اللي امي كانت حامل فيني قالولها اني بح مت لووووول
بس ييت بمعجزه :p
مايبوني بس غصب بيي شلون يعني
لووووول
و رفيجتي كانت ماره بيتنا امس بس كنت بثامن نومه و تلفوني سايلنت
كانت يايبه هديتي بس لووول مارديت عليها الا عقب جم ساعه
المهم هديتي االاكبر و الاحلى وجود الناس اللي احبهم بالمناسبات و بكل وقت :)

الخميس، 27 نوفمبر 2008

مسرحيه ...

صباح الخير


اليوم كان عندي محاضره رحتها غصب ماكان ودي اداوم بس رفيجتي الله يهداها داقه علي مخرعتني عشان تبيني اقوم اروح الكليه اقعد معاها كسرت خاطرها قالتلي جنج نايمه كملي نومتج بس سكرته طارت النومه



ممممممممم


رحت المحاضره و رديت اشوه ان ماكان زحمه


بس امبي عند الاشاره ياني مسج بطلته و قاعده اقرا احس اكو شي يمي طالعت و الا شرطي


جان احم احم نزلت التلفون شوي شوي يعني مو انا لووووووول


الحمدلله عدت على خير


بس المسج طلع من مرت خالي الله يهداها مستعيله بتكبرني تباركلي بعيد ميلادي



المهم رديت قلت لازم انام ماشبعت بس اخوي الصغير ياني و جابلني و يسولفلي عن مغامراته المدرسيه



و اختي تراويني شهادتها عاد قعدت و طارت النومه للمره الثانيه


و المغرب امي خذتني معاها الصالون و انا ماحب اروح بس جذي عاد خذيت معاي كتاب و يبت حق اختي


عاد انا اندمجت و اقرا صفحه ورا الثانيه بعدين شفت اختي هاده الكتاب قتلها شفيج تقولي سكتي خل اشوف المسرحيه



و الا وحده مسكينه مو عاجبتها التسريحه و قاعده تصرخ و تسب انا طبعا ويهي علامات تعجب و استفهام و كل شي



بعدين قامت تبجي و تتحلطم عن زوجها لووووووول بس ابشركم الحمدلله النهايه كانت سعيده سوولها تسريحه ثانيه و اعتذرت و طلعت لووووووول



صج كانت مسرحيه على قولت اختي الواحد مايدري يضحك و الا شيسوي


يعني عيب تطلع حرتها و عصبيتها بالناس و بمكان عام
الناس تتعقد ترى :p
المهم



اي حبيت اقولكم اني فتحت بلوق ثاني حق خواطري :)





تصبحون على خير

الثلاثاء، 25 نوفمبر 2008

متى ناويه تتزوجين

نامي ملوكه خمدي ملاكو ملووووووووك خلاص ناااااااااااااااااااااااااامي



تؤتؤ ماكو فايده انا فيني شي اليوم



الا ما خليت شي ما فكرت فيه



متى ناويه تتزوجين ؟؟؟



لووووووووووول سألتني رفيجتي و ضحكت بهستيريا على سؤالها

مادري يمكن تقولون عني معقده بس يمكن من اللي شفته




اول مره تقدمولي فيها كنت بالمتوسط عاد تخيلو الصدمه اللي حاشتني و انا ماعرفت الا عقب السالفه بسنه

و الفشله كانت ان العايله الكريمه كلها تدري و انا آخر وحده تدري


بذلك الوقت ماكنت افكر بعقلي يعني اوكي حجي كبار و خرابيط و انا بعدي صغيره


مستحيل اهلي يزوجوني بهالعمر



و ابوي الله يحفظه كان مانع اي احد ان يقولي بحكم اني صغيره و ما يبيني انشغل بهالسوالف


بس الحين العيال كبرت

بس الحين مادري احس القرار صعب و ان في خوف بداخلي يمنعني ان احاول اتقبل الفكره
تمر علي اوقات اتمنى البس نفنوف العرس
بس وقت الصجيه لا مااعطي نفسي فرصه
و يمكن لان اول شخص تقدملي كان كبير حيل كان عمره 37 و كنت بالمتوسط
و بعدين اللي تقدمولي بنفس عمري فما خذيت السالفه جد
و الباقي ما عرفهم و لما تقدمولي حسيت ان ابوي يبيني و كان خايف فرفضت
بس كل اللي اشوفه يحبطني



اذكر ايام الثنوي كنا نسولف انا و رفيجاتي و كل وحده تقول المواصفات اللي تبيها تكون بفارس احلامها





و لما كنت اقولهم بس ابي واحد يحبني و يخاف الله و ماعنده سوالف



تفاجأت ان تفكيرهم مو مثلي


اغلبهم يفكرون بالماديات وايد و مو مهتهمين حق بعض الامور المهمه مثل شغله و اهله و هالسوالف

و بالنسبه حق اللي تزوجو ما لقيت وحده مرتاحه

اللي تطلقت واللي ريلها يخونها و اللي يطقها
انزين انا ابي اعرف ليش؟؟

وايد يتطلقون و اهم صغار مادري شنو السبب



ليش نسبه الطلاق زايده وايد هالايام بالكويت

يعني حرام اعمارهم صغاااااار و مطلقات
في اللي عندهم عيال شذنبهم و الله مادري شلون صاير الزواج هالايام
يخررررررررررع



المــــــــــهــــــــم




انا بس حبيت اخذ رايكم بالاسباب اللي تأدي حق هالمشاكل و الخيانه و الطلاق
الرياييل حاقدين عالبنات و الا البنات اهم السبب ؟؟
انا من رايي البنات اللي اعرفهم مو قصرين ببيوتهم ابدا و تعرضو حق هالمشاكل
فمادري و الله
المـــــــــــــــــــــــــــــــــــهـــــــــــــــــــــــــــــــــــــــــــــــــــــــــم
مادري ليش قاعده اتكلم عن المشاكل و باقي
3 ايام و ادش ال19



امبي مادري شلون كبرت جذي بسرعه احس الرقم مو لايق :P







كبرنا و عيزنا



و حاسه ان محد راح يتذكر عيد ميلادي لان خلاص عيزت و محد يدري عني







اهيء اهيء







امبي صايره احن ابي بطريق لووووول شكله كيوت ابي واحد







انزين براويكم جم صوره صورتهم من فتره و اهم اهداء حق محب الغيوم اكيد عرفتو منو







الاخ العزيز ديكاتي :d










تصبحون على خير
ملوكه قررت تنام بعد ما طلعت من اللي بقلبها :)

السبت، 22 نوفمبر 2008

معرض الكتاب...

مساء الخير




امس رحت معرض الكتاب


كنت ابي اشوف الكاتب عبد الوهاب السيد عشان يوقع لي على كتابه 17 بس حسافه ماكان موجود:( ...







شريت كتابين حق خالد النصر الله (كويتي من كوكب آخر و التجربه الانجليزيه عندما تكون وحيدا في لندن) ووقعلي اياهم ^_^






الصراحه اول مره اشتري كتبه و قريت البدايه بس و عجبني...

و كان في معرض عارضين فيه لوحات صورتلكم جم صوره اللي عجبوني ...





هاذي عجبتني حيييييل تينن جنها صج





اشوفكم على خير :)

الأربعاء، 19 نوفمبر 2008

ليش ليش ليش ...


ليش ليش ليش
يتراوالي مستعدين تسمعون حنتي و تحلطمي اللي ما يخلص لووول
الله يعينكم علي
مساء الخير :)
ليش لما اروح ابي اخذ اختي من المدرسه يقولون ممنوع :@لا و تسألني جم عمرج اقولها 19 تطالعني جني جذابه
و اختي كل يوم تحن اخذيني لما تخلصين اقولها انطرج بره شقحي الطوفه و تعالي بسرعه


ليش اول ما اغير رنه تلفوني و احطها اغنيه ابوي يكون توه داش غرفتي و يزفني يقول شنو هاذا


ليش من يشوفوني ماسكه كتاب يخلوني و ينامون ما يشجعوني عالدراسه
عاد طفارتي جذي ماحب اقعد و الناس نايمين احب وقت اللي بنام او بدرس الكل قاعد
مسكينه امي قتلها بدرس موتخليني و تنامين قالتلي انزين
دقت رفيجتي و طحناله سوالف و تحلطم اكثر من اللي اقولكم اياه لووووول
بس سكرت التلفون و الا ماماتي نامت و خلتني :(
الكل نايم هدوووووووء جان اقوم اييب زوبا و زوما مساكين طول اليوم بالصااله و لا ادري عنهم


انزين و ليش لما يكون عندي امتحان يفتقدوني رفيجاتي بالمسنجر و يقولولي دشي اقولهم ماقدر عندي امتحان
و لما اخلص امتحاني ادش ماكو احد اللي نايمه والي تدش دقيقه و تقول بتطلع
مو شي

ليش اول ما يخلص رصيدي الكل يدزلي مسجات يحروني يعني و الا شسالفه :p


ليش وراي دوام طويييييل من التسع لي الساعه خمس بدون بريكات :(
ليش انا وايد حنانه ووايد اتحلطم ^_^

اذا عرفتوا الاسباب فيدوني الله يرحم والديكم
اشوفكم على خير:)



الاثنين، 17 نوفمبر 2008

فشه خلق

بفش خلقي اليوم عليكم

سوري داشه من غير سلام و لا مقدمات

بس فييني وايد اشياءات


اول شي زحمممممممممممممممه لييييش الزحمه صايره مو طبيعيه يا ناس انا توني اسوق حق الكليه بروحي كانت امي معاي احس بالامان بس ملوكه الشاطره قالت لا صرت كبيره لازم اروح بروحي صرت كبيره ^_^

امس كان اول يوم اروح بروحي و حشت سياره بنيه مسكينه احم احم
بس انقهرت انا اللي سيارتي يديده و توني اول مره اطلع فيها مع بروحي
بس ما قلت حق احد بس امي


عاد امي بس طلعت من البيت مسكت التلفون تكلم يدتي الحبيبه

و تقولها ملاكو رايحه بروحها اليوم و للحين مادقت >>بسافر مو رايحه الكليه


و يدتي تتفاعل مع السالفه و تقولها اول ما تدق عليج دقي علي و قــصــه

و امي ما فيها صبر اهي اللي دقت كنت توني صافطه تقولي ليش ما دقيتي ليش تنسيني ماتستحين قاعده احاتيج

حنه الامهات اللي تعرفونا


المهم عدت على خير الحمدلله
عند الاشاره لازم القى شي يضحك لوووووول


شدعوه اريل هالطول ...



ليش هالبلونات لووووول ترى هني مبينه وحده بس الصج في ثنتين


و اليوم مريت على رفيجتي و وصلتها و الله ضيقه خلق لما اكون بروحي اتحلطم بروحي جني مينونه

لوووول


شسالفه كل الناس مرضانين انا بس صداع كل يوم جاي و بندول




بسرعه يأذن المغرب ملاحظين ؟؟
ما يمدي اسوي شي و صايره انام مبجر


و اليوم كان عندي مدتيرم اتوقع كنت نايمه فيه لوول

جد ترى ماكنت بوعيي سلمت الورقه وطلعت احس كلا خرابيط

و عيني ترف صارلها يومين و اليوم بزود تأذيني




صارلي جم يوم قاطعه الممشى و رفيجتي fo0o2a

الحين شكلي بنام عشان اسهر بليل و اطالع افلام هنديه ^_^


على فكره للحين ماطلعت كل اللي فيني نطرو البوست الياي


اشوفكم على خير

الأربعاء، 12 نوفمبر 2008

الممشى

هااااي




هالايام صايره حدي مشحونه و مضغوطه من الدراسه


بس قلت ماكو الا شيين الردبول :D و الممشى اروح اطلع طاقتي بالمشي


الردبول في ناس مانعيني عنه لوووووول




عاد قلت حق رفيجتيfo0o2a


و لحسن الحظ انها فاضيه مثلي


و مرتني و رحنا تمشينا شوي


طبعا كل الناس شادين حيلهم و مشي من قلب


و احنا لاهين بالسوالف لووووول


اي مو لان من زماااااااااااااان مو شايفتها :)


و الظاهر اليوم بعد بنروح و نكمل مشوار اللياقه



اي خل اقولكم شنو حلمت امس


سمعوا الله يسلمكم حلمت اني لقيت بقفص زوبا و زوما ثلاث بيضات و كنت متشققه من الوناسه


ان اخيرا بشوف احفادي بس زوبا كلا عياله @@@@@@@@@@@@



ترى بالحلم مو بالصج :p


بس حلم صج مزعج و قعدت من النوم مخترعه ثلاث و نص الفير و اللي كملها الهندي دق و خرعني


صج صج بغيت احذف التلفون بس الحمدلله اني نمت بسرعه


الظاهر كلا من خوفي من الامتحان

ترقبو البوست الياي راح اطلع اشياء وايد باطه جبدي :D

اشوفكم على خير


الخميس، 6 نوفمبر 2008

مخي مو معاي:D







السلام عليكم



هاليومين انا فيني شي بس شنو مادري لوووول



طول المحاضرات اتثاوب بس ابي تخلص المحاضره


لا و بعدين رفيجتي ردتني البيت و نسيت كتبي بسيارتها مسكينه ردت يابتلي اياهم

يعني صج صج اليومو امس مو طبيعيين



صايره اتعبث وايد لوووووول

شوفو شنو لقيت

هاذا العطر يابتلي اياه رفيجتي من لندن و لا مره استخدمته حاطته بالدرج و ناسيته

و رحت الحوش اللي من زماااااااان ما تمشيت فيه و لا ادري عنه و اكتشفت ان عندنا حديقه لووووول




هاذي شجره ليمون





هاذي فيها مثل قطن مادري شيسمونها



هاذي ورده عنونه حلوة



و سلامتكم


بوست عالسريع سامحوني:D

الأحد، 2 نوفمبر 2008

يوم متعب



مساء الخير




ادري صايره بخيله ما انزل بوستات مثل الناس




بس سامحوني و الله صاير ماعندي وقت




شغل البيت وايد :p



و الصداع صارله جم يوم مو مخليني بحالي




خذيت حبه من هاذا قالولي وايد زين جربته و الله زين خفف العوار







اليوم كليت شي حلووو






منو يحب الذره :P






من زمان ما كليتها كامله :Dاحس طعمها احلى






اليوم الجو كان وااااااايد حلو مع المطر حده عجيب






بس اللي خرب مزاجي :@






حسبي الله عليه






واحد هندي صارله اكثر من سنه يدق على رقمي






و جم مره ابوي و اخوي يزفونه بس ماكو فايده






الحين قررت اغير الخط لان جد تنرفزت تلفوني كله سايلنت و لما اخليه عاد اينني





لازم يدخل موسوعه قنس وصل 70 مسكول في ساعه :S




لا و يدز مسجات ما افهم منهم شي






مع اني ما ارد عليه و كلا اسكر بويهه يدق ما يمل






في احد يعرف 947 فتح خط وين ؟؟؟






و اللي كملتها بعد هالحلوة






الآنسه زوما تعلقت ريولها بخيط و شكلها تعورت






مسكينه طلعتها عقب حبسه طويله :p






بس الحين بدت تتشيطن



يلا اشوفكم على خير و سامحوني عالقصور ^_^

الأربعاء، 29 أكتوبر 2008

مشتااااقه


السلام عليكم



تسألني الناس عني كيفها احوالي اقول بخير و ماني بخير يالغالي


تعبان انا يا حبيبي راحتي قربك و الخير ما اشوفه الا بشوفك قبالي



مشتاااااااق لك موت و الله عووووووود يا عمري يالله


ارجوك يا حب غالي عوووووود مالك بدالي و انا مالك بدالك





سمعت هالاغنيه اليوم و تأثرت وايد بكلماتها


تذكرت رفيجتي اللي توفت حلمت فيها اول امس منو يعرف يفسر احلام :)


حلمت اني شفتها و كلمتها و كنت حيييل مستانسه اني شفتها و قعدت اقولها الناس يقولون انج توفيتي


جان تضحك و قالت لا كاني ...


بعدين قلت حق الناس محد صدقني و اهي اختفت بعدين يعني بس انا شفتها


و الله قعدت من النوم متضايقه حيل ان خلاااااااص ماقدر اشوفها


الله يرحمها عمري ما زعلت منها




......



حبيت ادردش معاكم شوي عن يومي الطويل


كانت المحاضره الاولى الساعه تسع لي 11 و كان عندي كوز برمجه طقطقت فيه الله يستر


و المحاضره اللي عقبها الدكتور كان معتذر جان نطلع انا و رفيجتي شوي و طافتنا المحاضره اللي عقب من الزحمه


و المحاضره الاخيره كانت من 2 لي 5 صدددددددعت


الجو اليوم كان حده روعه و الهوا اينن


عسى دوم هالجو بالكويت


happy week end مقدما ^_^


اشوفكم على خير

الجمعة، 24 أكتوبر 2008

بصرح لكم بموهبتي الشتويه :p



السلام عليكم



امبي المطر اليوم كان عجيييب شكله وايد حلو



و الزميل العزيز ديكاتي ماقصر بوصفه :p


بهالمناسبه و ان اخيرا طق عندنا مطر عقب جهادنا المتعب خلال الصيف



ترى كلا انتاج كويتي من ايدي :D



هذيل مادري شييسمونهم حق التلفون :p








هاذي عارضه الازياء اللي عندي ^_^



شرايكم بالكبوس؟؟؟









و هذيل اللفات ^_^








ادري تصويري مو شي سامحوني لاني دايخه قاعده من صباح الله خير

كان عندي اكثر بس وزعتهم :D

ها منو بيسجل دوره عندي :p

اشوفكم على خير :)

الأحد، 19 أكتوبر 2008

طلعلي ضرس العقل:s

السلام عليكم
اليوم الله يسلمكم كان عندي محاضره وحده خلصت جان اقول خل اروح الاسنان اعالج اللي بقى عشان التقويم
وهناك اول ما دشيت و الا دكتور صغير شكله بالثنوي سألت السستر هاذا الدكتور قالتلي اي
اخترعت انا بروحي اخاف من الاسنان و امي بعد تخاف يوم شافته تدريب واقفه عند الباب خايفه
مسكين اهو خايف و انا خايفه اكثر منه
و المصيبه يقولي فتحي حلجج اقوى شي بالعالم و انا امبي تييلي ضحكه بس فشله
بس الحمدلله عدت على خير من غير ابره ^_^
و عطاني تحويل عشان التقويم و رديت البيت ساعدت امي بالغدا و تغديت و نمت و توني قاعده
و الحين بجابل التلفزيون و باجر دوامي طوييل
اشوفكم على خير :)