السبت، 27 سبتمبر، 2008

عيد سعيد





يقولون عيد سعيد :)



بس انا وحيده يوم العيد



و المفروض بصباح العيد اروح مقبرة احلامي



و ابجي و الناس تعزيني



العيد بعد يومين ...


العبرة تخنقني وايد و تخليني اتمنى لو ماكنت موجوده



مو قادره اجامل بابتسامه وراها جرح كبير



مجروحه




باختصار هاذي الكلمه اللي اقدر اوصلكم فيها حالتي



و بهاللحظه بالذات اتألم من جروحي



انا وحده ماقدر انسى قلبي دفتر ذكريات



شلون بنسى جروح اكبر من احتمالي



حتى ان الناس تنسى الموقف و مرت عليه سنين



بس محفور بقلبي و لما ايي نفس الشخص يجرحني مره ثانيه يرجع شريط الألم كامل و جنه موقف يديد جدام عيني



يمكن تقولون حساسه زياده بس والله ما ابالغ هاذا الواقع اللي اعانيه



و السنه هاذي اكثر سنه مرت علي متعبه





بس ان شاء الله من هالعيد بحاول ابدي حياتي من يديد





لاني الفترة اللي فاتت كنت مثل الميته مافيني حياة على قولتهم :)





ادري تشوفوني يائسه و متشائمه بس ما عليه اللي مريت فيه كان فوق احتمالي




بس انا للحين اؤمن في جمله دايما يقولها عمي : و من يتأهب صعود الجبال يعش ابد الدهر بين الحفر



و بوجودكم اخواني و خواتي اللي تشاركوني لحظاتي الحلوة و المؤلمه تسهلون علي كل صعوبه :)



و من غلاتكم انا ماقدرت اقطعكم مده طويله من غير لا ادش بلوقي اللي دايما تواجدكم يريحني فيه



:)


و كل عام و انتو بألف خير





هناك 15 تعليقًا:

غريب يقول...

عزيزتي بختصار تري الحياة حلوه لازم تعيشينها بالطول وبالعرض ولا يطوفك منها شي ولاتحسفين علي شي مضي وكل شي يطوفك تأكدي بأ الياي أحلا وعلي قولة الشاعر يامدور الهين تري الكايد أحلا
تحياتي لك

3bady يقول...

طالعي نفسج بالمنظره و قوليي انا ليش زعلانه انا ليش متكدرة

لي متى بظل جذي ابي احد يعطف عليي ابي احد يحس فيني و يواسيني

خل يصير عندج ارادة و روحي فضفضي الي بداخلج حق احد ترتاحين له

روحي ضحكي تره الدنيا حلوه و ما تسوى الزعل :)

كلنا عندنا هموم و احزان بس لي متى بنخليها مسيطره علينا ؟

ليش ما انروح نطلع و انغير الجو و انبطل صفحة اتنسينا الي صار امس

اتعوذي من بليس و اقري لج جم صفحة قرآن

و ادعي بعد كل صلاة انه همج يروح و ان شاءالله يروح :)

terkwaz يقول...

لا تتضايقين
ردي لنفسج وشوفي كل حساباتج

اذا بتوقفين حياتج على موقف
او شخص ماراح تخلصين...

ماكو اي شي يسحتق توقفين عنده..

وعقب الضيجه انشالله الفرج


والعيد على الابواب
غيري جو واستانسي :)

وعيدج مبارك

ManalQ8 يقول...

الحياة فيها الحلو وفيها المر
والانسان

يحاول ويجاهد نفسة على ان يعيش يومة ويكون مستعد للمستقبل

انتِ قوية

وان شاء الله هالعيد والايام القادمة

كلها سعادة

ان شاء الله تعالى


عيدكم مبارك

mo3ath يقول...

اول شي تقبل الله طاعتج ومن العايدين الفايزين ان شالله

ثاني شغله ، الحياه اقصر من ان الواحد يزعل عليها ، صحيح المواقف والذكريات تضايق بس الانسان يكون قوي إراده ويعرف ان الزعل عمره مايرجع احد ولا يصلح شي انكسر

عيشي يومج لنفسج واستانسي بكل لحظه وحسي بالفرحه الي تنسيج طعم الحزن والزعل ، ترى الحياة حلوة إذا عشتيها مع الي يستاهلها ويقدرها ..

الي راح راح وعمر الزعل مارد شي ، زعلي على شي بلحظته محد يمنعج بس لاتعطينه فوق حجمه

:)

q8loco يقول...

mako shay yestahal!

الطائر الحر يقول...

اولا تقبل الله الطاعات ......على فكره الحياة حلوه وايد وجميلة بس تبي منو يفهمها عدل كلنا نمر بمشاكل يوميا وبعض المشاكل وايد صعب اننا نتحملها بس ما جدامنا حل غير اننا نبتسم للحياه ونقول الحمدالله على كل حال والله يسامح اللي كان السبب ......

malak يقول...

غريب


اي و الله انا طافتني وايد اشياء لاني حابسه روحي بحزني

بس ان شاء الله خلاص :)
ماراح يتكرر هالشي



...................

3bady


صح كلامك لازم اصير قويه لاني لو بنطر عمري بيروح و لا راح يتغير شي :)


..................


terkwaz



ان شاء الله استانس هالعيد دام انتو معاي :)

ايامكم سعيده
..................


manalq8




الله يسمع منج :)

ايامج سعيده

.................


mo3ath




منا و منك :)


ان شاء الله بحاول اغير من نفسي و اكون اقوى

و مشكور وايد على تشجيعك :)


.................

q8loco


اي و الله مافي شي يستاهل بس ان شاء الله اقدر انسى :)


................


الطائر الحر




منا ومنك


الحمدلله على كل حال

و الله يسامح اللي كان السبب :)

7osen يقول...

في الحياة تمر علينا واايد تجارب
قد نتألم منها وقد نسعد وقد ننجرح لكن لازم نكمل ومانوقف عند اي احد لأن بكل البساطة الحياة ماتوقف عند احد

ابدي من جديد
حاولي

تحياتي لج
وكل عام وانتي بخير
وعيدج مبارك

kuwaitya_7saweya يقول...

عيشي حياتج وانسي او تناسي الحزن
ومع الوقت بتنسينه
وعيدج مبارك وسعيد قولي آمين

ولاتنسين العيديه D:

malak يقول...

7osen


و انت بخير و ايامك سعيده :)



............


kuwaitya_7saweya




اكيد الوقت بيداوي كل الجروح الصعبه


ايامج سعيده حبيبتي

و افا عليج العيديه موجوده :p

Mr. Solutions يقول...

تفائلو بالخير تجدوه
عيدج مبارك وتقبل الله طاعتج

Funny Q8i يقول...

يقولون طنش تعش تنتعش :)

انا اقول عطيها طااااااف! D:

وطالعي الزين واحمدي الله على نعمه

ويومن لك ويومن عليك لووووول

وانشاء الله عيد الاضحة (بالتاء المربوطه) يكون احسن لوووول

وكل عام وانتي بخير

malak يقول...

Mr. Solutions




ايامك سعيده


منا و منك اخوي :)


............

Funny Q8i





الله يسمع منك اخوي


و انت بخير و صحه و سلامه :)

أتيت متاخرة يقول...

ربي يبعد عنج الهم والكدر

ملاك حبيبتي تناسي وكملي حياتج
لان النسيان كذبة كبيرة واحنا نصدقها
تناسي وعيشي حياتج
خل رقم واحد بحياتج ملاك
وسعادة ملاك
ووناسة ملاك

قولي الي بخاطرج للشخص الي مسبب لج هالشي اذا ما قدرتي كتبيه بورقة وحرقيها
أهم شي لا تحطين شي بخاطرج يا غالية

>>> يلا يلا حنه عيد نبي نرتاح ونستانس
ونبي عيادي